RiddleR’s Articles – smart solutions, thoughts │ مقالات ريدلر – حلولا ذكية، خواطر

مين يصدق؟ إني كان ممكن أعدي 200 بوست؟ لا ومش أي كلام والسلام يعني – لا في مواضيع كانت جامدة جدا وفي حاجات كانت مجرد تهييس!!
كنت لسه ناوي أعمل بوست “لقطات من اليوم” زي أول واحد كدا،
بس غيرت رأيي ف أخر لحظة؛ أخر لحظة دي اللي هي السطر اللي فوق دا!
المرة دي هناخد لقطات أكبر من كدا شوية. البوست قبل 200 بشوية كان خريطة للموقع. تنفع للزوار من ناحية، وتنفع في فهرسة الموقع من ناحية تانية. تفتكر ممكن تعمل فهرس أو خريطة لحياتك؟؟ صعبة شوية! طيب هنبص سوا على البلوج ونشوف ايه اللي أنا كنت بكتبه دا:
بدأت البلوج دي أصلا في أوائل 2006 – كانت قدام عيني صورة البلوج بتاعة المهندس حسام عامر – مدير شركة انترلينكس – عشان كدا كنت ناوي أخصصها للانظمة مفتوحة المصدر والكمبيوتر والنظم، وفعلا دا اللي حصل، بدأت بشرح أوامر في اللينكس وترجمة ملفات دعائية ليه، وبعد كدا كنا بنستعرض موقع أجنبي يقوم بعرض لقطات استكشافية من داخل نظم لينكس كنوع من الدعاية والشرح، وكان في هناك نسخة أرابيان لينكس ليها صورتين بس، قمت عملت ليها ألبوم كامل وبعته لصاحب الموقع، وأعتقد انه – والحمد لله – زود عدد المستخدمين واحد على الأقل. وشرحت برامج مفتوحة المصدر وقدمتها لبعض الناس، لحد ما انقطعت فترة كبيرة عن المدونة، وكنت زهقان ومش عارف أيه اللي ممكن أكتبه وأفيد الناس بيه. أيامها بقيت أدور على موضوع المحتويات المجانية للمواقع زي حكاية مراحل ظهور القمر (دي تحليل حي/لايف لتطور القمر يوم بيوم) ومربع الكلمات المتقاطعة. بعد كدا كنت هابدأ سلسلة عن تقديم نظم التشغيل ولكن زي ما تقولوا كدا كسلت او ملقتش حد يتابعها فطنشت. في الوقت دا كمان كنت مشرف منتدى شرح البرامج في لينكس دنيا المعرفة ومشرف أنظمة التشغيل كلها في الهندسة نت – وأكيد سمعتهم معروفة – فكنت مشغول عن المدونة برضه. بعدها قررت إني أبدأ من أول وجديد بتعريف نفسي – لأن وقتها كان ليا مشاركات على النت كتيرة جدا – حبيت اعرف الناس مين هو ريدلر فعلا – الاسم اللي ليه حكاية غريبة معايا! كتبت فعلا نسخة من السي في بتاعي على الموقع. أعتقد إنه عمل فرق كبير في أحداث كتيرة معايا. ومرة تانية رجعت انشغلت ومش لاقي مادة أكتبها. وعلى فكرة انا العيب دا فيا من زمان، يعني والحمد لله أعتقد إني بفهم في حاجات كتير لكن مكنتش عارف أظبط منهج أو نظام أكتب عليه. فبدأت أكتب شوية حاجات مفيدة أو مرحة بتقابلني على النت او من مصادر أخرى. بعد كدا عملت اسطوانة ريدلر المتقدمة – واللي كانت معمولة مخصوص عشان ناس طلبتها مني – هما كان كل طلبهم: عاوزين اسطوانة ويندوز تنزل على الجهاز من غير وجع دماغ وياسلام لو معاها شوية برامج. وفعلا عملت اول اسطوانة وحتى مكنتش مهتم ارفعها على النت – لكني فوجئت ان الاسطوانة دي اتنسخت اكتر من ميت مرة – بالنسبة لي كانت مفاجأة؛ أنا قلت يعني هما خمسة ولا ستة اللي هيسطبوها، قلت خلاص أكتب لها بوست يبقى زي دعم فنى عشان اللي يحتاج حاجة. بعد كدا بدأت أفكر أعمل بوستات للحاجات اللي أنا بفهم فيها واحدة واحدة. يعني حاجة زي لايف هاكر ورايموند. مع إني والله مكنتش لسه شفتهم، بس كنت بدأت أنظم تفكيري في الكتابة. بعد كدا بدأت أكتب اللي ييجي على بالي؛ كتبت عن نفسي وليه كنت انطوائي – ولسبب ما كتبت بالانجليزي – يمكن عشان كنت عارف ساعتها مين بيدخل الموقع ومش عاوز أي حد يعرف يقرأ الكلام دا. وبدات أكتب بحماس اكبر. أكتب عن حاجة قابلتني في مجلة، أكتب حاجة لقيت ناس بتسأل عنها. وهكذا……
وساعتها كنت بدأت أتعرف على ساقية الصاوي فكتبت عنها هي كمان، لحد ما حصل لي موقف شخصي، خلاني أتخنق جدا، وأكتب الموضوع اللي غير حاجات كتير في حياتي: ازاي تنتقم من الناس!!!! الموضوع أصلا كنت ناوي عليها من أول ما الموقف دا حصل لي، لكني كتبته بعدها بفترة كبيرة. وتوقعت إني هعرف أجمع آراء الناس وفكرتها عن الانتقام. تقريبا دا حصل بنسبة صغيرة، و80% من ردود الفعل مكنتش متوقعها ولا فكرت فيها أصلا! لكن اللي حصل بقى.
رجعت تاني أكتب حاجات عادية، برنامج عملته وانا بتعمل برمجة، روابط مهمة لكل جديد في عالم اللينكس – زي ما أنا بدأت طبعا. وكتبت بعدها بوست عبرت بيه عن فترة جت عليا كنت شغوف جدا بنظم التشغيل عامة وبنية الكيرنل وما إلى ذلك. كنت أيامها مسطب الفيرتشوال ماشين في البيت، وعملت له هارد صغنن كدا، كنت بشوف عليه أكتر من 10 نظم تشغيل، منها المتقدم والبسيط. لحد ما ربنا هداني وبطلت!
بعدها وقع تحت ايدي أشعار نثرية لا توصف، نشرت منها كام واحد في محاولة مني لمعرفة صاحبتها، لكني لم أوفق في ذلك. ورجعت تاني أكتب عن الحاجات اللي تنفع أي مبتدئ على النت والكمبيوتر: روابط وأدوات مهمة، حاجات مخفية في جوجل مثلا وحاجات تانية كمان عشان تعمل ترافيك للموقع بتاعي.
زي برضه ما بدأت في رواية فراشة لكني برضه مكملتهاش بسبب نقص الحماس، مع إن البلوت بتاعها كان جاهز كاملا بملامح الشخصيات وخط سير الأحداث في كشكول محاضراتي . في الفترة دي كمان كنت عملت مدونة عشان واحد – بيزنس يعني مش خدمة لصديق- فدا خلاني أشوف موارد ومصادر أكتر بتتكلم عن التدوين وسنينه، ومسكت القالب بتاع المدونة وغسلته من اوله لأخره، ومش هنسي اليوم دا كنت سهران يومها ف الشغل وخلصت شغلي بس كنت مضطر أبيت هناك في المكتب! لأسباب كدا، فقلت أستغل الفرصة وأظبط الموقع، كنت بظبط الموقع وبكلم أصحاب ليا ع الياهو. وكمان كنت مقضيها ف الموبيل. انا فاكر اليوم دا كويس جدا: كلمت شيماء في التليفون كتير جدا. المهم جيت كمان مرة سهرت سهراة منيلة ع المدونة عشان أحط عناوين/تصنيفات لكل المواضيع القديمة عندي. بعد كدا بدات مرحلة جديدة من التدوين الجاد: أفكار مرتبة، حاجات من اللي ينفع يتقال عليها مذكرات، وما إلى ذلك من عناصر المدونات.
كنت ناوي كمان أعمل منتدى لكن الفكرة رجعت مش عجبتني!!! فسبتها. وحطيت برنامجين حلوين صغننين كنت عملتهم وأنا بتعلم برمجة برضه، وبدأ التدوين بالنسبة لي ياخد منحنى جدي تاني، يعني كنت بحاول أعلق على ما حولي، زي موضوع انتشر فجأة وهو المسلم والمسيحي وفعلا محدش عارف من امتي وفي فرق؟!!!
بدأت أوسع نشاطاتي، وبدأت الكتابة في ويكيبيديا كمان وكانت خطوة كويسة فعلا. وكنت ساعات بستعير روابط من عند سردال، المدون العربي الأشهر، وكانت حاجة كويسة جدا تخليني أفكر في المدونة بتاعتي مرة تانية.
وسمعت بعدها عن نانوريمو. ازاي؟ أقولكم….
كنت بشوف حاجات اعملها ف المدونة جديدة فقعدت أقلب في المساعدة بتاعة بلوجر، لقيت سؤال: ازاي أنشر رواية في بلوجر؟ فقالو له انت مثلا كتبت رواية في نانوريمو، تقدر تعمل كذا وكذا عشان تنشرها. كنت أيامها طول ما أنا بقرأ ع النت تلاقيني فاتح ميت صفحة على الفايرفوكس، يعني طول ما أنا بقرأ موضوع ويقابلني لينك، أفتحه في تاب جديدة عشان أقراه لما أخلص. وهكذا عرفت ايه هي نانوريمو ودخلت فيها. مكانتش الأمور واضحة جدا قدامي. ولحد النهاردة عندي نسخة من الرسايل اللي كانت بيني وبين مديرة الموقع اللي متأخرتش عليا ف أي إجابة. وبعدها برضه مكنتش لاقي تشجيع أوي لحد ما كايت بعتتلي تقولي طالما انت من القاهرة تعالى معانا في السكشن بتاع مصر، وكمان تحضر معانا في قعداتنا. فوافقت طبعا! وبدأت يبقى لي نشاطات تانية في وقتها، زي ساقية الصاوي وويكيبيديا وشهر النانوريمو. أعتقد إن أسلوبي إتحسن مرة كمان، يعني أخد منحنى جديد كويس، وبقيت أتكلم عن اللي بشوفه، وبسمعه، وبقراه. حطيت بعدها كورس تعليم صيانة الكمبيوتر بتاع محمد حامد أو موودي – اللي هو أصلا جوز أختي – وانتشر هو كمان، وبدأت أعتقد إني بفيد الناس. بعدها رفعت لأول مرة فيديو على اليوتيوب تعليقا على حاجة أنا شفتها ومعجبتنيش، عملا بنصيحة من مدون، عن التدوين الفيديوي. وبسبب سندريللا دخلت في مجتمع المدونين أكتر، وعرفت مدونين وتاجات ومدونات وما إلى ذلك. ومش عارف والله للمرة الكام، أرجع أبص ورايا تاني وأشوف أنا وصلت لفين وبدأت أرجع تاني للأساسيات اللي قامت عليها المدونة. بعدها عملت نسخة جديدة من اسطوانة ريدلر المتقدمة ورفعتها على النت بصعوبة فظييييييييييعة، وعرفت ان اتعمل لها داونلود اكتر من 350 مرة من الموقع الأصلي بس، دا غير النسخ العادية. كتبت بعدها مقالة حتى الآن الكل مستغربها ومش عارف قصدي منها ايه ومعتقدش عمري هقدر أوضحها. بعد كدا بدات أكتب مقالات كويسة عن الكمبيوتر تاني. بعد ما وقع تحت ايدي مصادر جامدة جدا في موضوع تحسين ترتيب موقعك في البحث. وكتبت البوست اياه. ولما وصلت للبوست رقم 101 قلت أظبط الموقع تاني بالمناسبة دي، للأسف من فترة صغيرة عرفت إني كنت غلطت في العد، لأني عديت بوستات مازالت مسودات، ومش عارف امتى ممكن تشوف النور!!
بعدها شفت الكليب اللي عجبني أوي بتاع وسط البلد ولأني كنت بشوف ليها بروشورز كتيرة في الساقية، قررت أكتب عنهم موضوع لأني مقدرتش أوصل لصفحة خاصة بيهم عليها كل اللي الناس عاوزينه، فقلت أعمل حاجة زي كدا. والبوست دا كان سبب في حياتي تتغير بشكل كبير بعد كدا ومازالت، وهتفضل بسبب البوست دا تتغير للأحسن .
وعودة إلى عالم الكمبيوتر، وزي ما قلت قبل كدا كنت بكتب عن الحاجات اللي بتعلمها وبفهم فيها، ومنها مثلا موضوع الناس اللي وصلو لموقعي كانو بيكتبو ايه على جوجل ولقيت حاجات غريبة! وأكتب بقى فعلا حلول ذكية للمشاكل اللي بتواجهني في شغلي أو في كمبيوتر البيت. البوست رقم 100 فعلا كان صورة للاسطوانة بتاعتي وهي شغالة على لاب توب بتاع جوز أختى.

يــتــــبــــــــــــــــــــع