أنا عمري ما فرقت بين مسلم ومسيحي، لأني اتربيت كده – و عشان محدش يفهم على مزاجه أنا والدي كان إمام في جوامع كتير – لكن هوه طلعنا كده
و أنا نفسي لما كنت في ثانوي أخدت دروس مع مدرسين مسيحيين و كانوا أحسن 3 مدرسين عرفتهم في حياتي العملية همه و مستر عبدالرحمن طه بتاع الإنجليزي
الاول كان استاذ مجدي وكان عليه التزام بالمواعيد والله عمري ما شوفته – و كان دايما يقول إن التزامه بالمواعيد مع الناس زي التزامه مع ربنا – و عمره ما قصر في وظيفته – بشهادة تلامذته اللي كانوا بياخدوا معانا درس منظرة، وأما لقاهم بيستهبلوا طردهم من الدرس…. اللي عمر ما مدرس عملها – و كان عنده مادة علمية قوية عمره ما استخسرها في حد – طالما احنا عايزين وعندنا استعداد
التاني كان مسيو أمجد سليم بتاع اللغة الفرنسية، وكان شرحه – و كان دايما مهتم بمستوى الطلبة اللي بتاخد معاه
التالت وألذ واحد فيه أستاذ وجيه توفيق مدرس الرياضيات – كانت أعقد مادة في تانية و تالتة – لكنه خلانا نحبها و عمره ما قصر معانا في حاجة، عشان كده لسه لما بشوف حد منهم لازم أقف – احترامًا له – و أسلم عليه
و أستاذ وجيه كان دايما بيهزر ويقول “اللي ميعرفش ييجي في ميعاد الدرس، ييجي يحضر المجموعة بتاعة الكنيسة – بس وهوه داخل يقول ان اسمه مايكل” و كنا كلنا بنضحك
ليه فجأة بقى فيه فرق؟ أنا مش عارف
لكن هأفضل كده – عمري ما أفرق غير بين إنسان حلو وإنسان وحش وبس
